ಶಿವ ರೂಪಕಲ್ಪನ ಕಾವ್ಯ
ಶಿವ ರೂಪಕಲ್ಪನ ಕಾವ್ಯ
ಹಿಮಸುತೆಯಪತಿ ಮಹಿಮಗಿರಿಯೊಡೆಯ ಶಂಭೋ
ಮನದರಿಯ ತರಿದು ಅರಿವ ಬೆಳಗಿಸು ಶಂಭೋ || ಪ ||
ಹರಹರ ಲಯಹರ ಮೃದುವದನ ಹರಿಬಂಧು
ಜಯಕರ ಹಿತಕರ ಜನಮನಗಮನ ಸಿಂಧು
ದಿನಕರ ಯಮಹರ ಮದನಹರ ಹರ ಶಂಭೋ
ವರ ವರದ ಅಮರ ರುದಿರ ಶಿಶಿರ ಸುಬಂಧು || ೧ ||
ಅಸುರ ಸುರ ನರ ಅಚರ ಚರ ಗಣಕೆ ಈಶ
ಮೃಗಚರುಮ ವಸನ ಮೃಗಪತಿಯೆ ಜಗದೀಶ
ಮನನ ಗಮನ ಕಿಡಿನಯನ ಪರಮ ಗಿರೀಶ
ಗುಹ ಗಣಪ ಗಿರಿಜೆಯೊಡೆಯನೆ ಉರಗಭೂಷ || ೨ ||
ಕರದೊಳಗೆ ಡಮ ಡಮ ಡಮ ಡಮರ ನಿನಾದ
ಜಗಜಗದ ಕಣಕಣದಿ ಶಿವ ಶಿವ ಸುನಾದ
ಮನಕೆರಳೆ ಸುಡುಕಿಡಿಗೆ ಯುಗಯುಗದ ಅಂತ್ಯ
ಗತಿಯೆನಲು ಗತನವನು ಅಮಿತಜನ ವಂದ್ಯ || ೩ ||
ಜನಮನಕೆ ಕೆಡುಕೆನಿಪ ಕಳೆಕಳೆವ ಕಾಲ
ಇರಿದಿರಿದು ಅರಿಗಳೆದೆ ಬಗೆಬಗೆವ ಶೂಲ
ಬಳಿದಿರಲು ಮಸಣ ಬಸುಮ ಮಹಿಮೆ ಅನಂತ
ಅಹಿತವನು ಹಿತವೆನಲು ಕರುಣಶಿವ ಕಾಂತ || ೪ ||
ಜಗದಗಲ ಹರ ತಿರುಗೆ ಹೊರುವನವ ನಂದಿ
ಶಿವಶಿವೆಯ ಮಹಿಮೆ ಜನ ತಿಳಿಯೆ ನೆಪ ಭೃಂಗಿ
ಹರನೊಲವ ಇಳೆಗರುಹೆ ಮಹಿಮಗಣ ಶೃಂಗಿ
ವಿಷಕುಡಿದು ಜಗಪೊರೆದ ಪಶುಪತಿಯೆ ದಂಡಿ || ೫ ||
ಶಿರದೊಳಗೆ ಶಶಿಬೆಳಗೆ ನಿಶೆಗಳೆವ ಚಂದ
ಹರಜಟೆಯೆ ನೆಲೆಯೆನುವ ಸುರನದಿಯು ಗಂಗಾ
ದುರುಳಮನ ಮತಿಗೆಡಿಪ ನಿಜಶರ ಪಿನಾಕಿ
ನಿಜಬಕುತಿ ಜಗಮುಕುತಿ ಶಿವನೊಲವ ನಾಕ || ೬ ||
ಶಿವನೆನೆಯೆ ಪದುಮಜನು ಜಗಸೃಜಿಪ ಹಂಸ
ಜಗಪೊರೆವ ಹರಿಯಿರಲು ಉಸಿರುಸಿರೆ ವಂಶ
ಉಸಿರಳಿಯೆ ಲಯಹರನೆ ಇಹ ಪರಮಹಂಸ
ಸಕಲಮನ ಇಹಪರದಿ ಶಿವಶಿವೆಯ ಅಂಶ || ೭ ||
ಸಸರಿರಿಗಸರಿಗ ಸನಿದಪಮ ದನಿ ರಾಗ
ತಕ ತಕಿಟ ತಕಿಟ ತಕ ನಲಿಪ ನಟರಾಜ
ಪರಿಸರದ ನುಡಿನುಡಿಯು ಹರನೊಲವ ಗಾನ
ದಿಟಮನದ ಸಕಲಕಲೆ ಶಿವನೆಡೆಯ ಯಾನ || ೮ ||
ಶಿವಪದದಿ ಮನವಿರಲು ಬರಬಹುದೆ ಕುತ್ತು
ಮನಮನದಿ ಹರನೆನಲು ಸರಿಯುವುದು ಮೃತ್ಯು
ಋಷಿಜನಕೆ ಮುನಿಗಣಕೆ ಗುರು ಶಿವನನಂತ
ಲಯಹರಗು ಗುರುವವನು ಗಿರಿಜೆಶಿವ ಕಂದ || ೯ ||
ಹರಹರನೆ ಪುರಹರನೆ ಮುರಹರನೆ ಶಂಭೋ
ಅರಿ ತರಿದು ಕರಪಿಡಿದು ನಡೆಸೆನನು ಶಂಭೋ
ಅಚಲ ಚಲ ಬಲ ರುದಿರ ಗುರುತರನೆ ಶಂಭೋ
ಜಯ ಜಯತು ಪಶುಪತಿಯೆ ಜಗದೊಡೆಯ ಶಂಭೋ || ೧೦ ||
ವನಜದಳ ಅರಳಿರಲು ಕವಿಮನದಿ ಕಾವ್ಯ
ಪಶುಪತಿಯ ನೆನೆದಿರುವ ನುಡಿಯಿದುವೆ ಭವ್ಯ
ಪದಪದದಿ ಶಿವಬಕುತ ಪಯಣಿಗನ ಭಾವ
ಮೃಗಪತಿಯೆ ನಲಿನಲಿದು ಹರಸೆನಗೆ ದೇವ || ೧೧ ||
- ಪ್ರಕಾಶ ಪಯಣಿಗ
Comments
Post a Comment