ಶನಿಯ ಉಪಗ್ರಹದಿಂದ ನೀರು ಚಿಮ್ಮುತ್ತೆ....!

ಈ ಬ್ರಹ್ಮಾಂಡದಲ್ಲಿ ಎಲ್ಲೆಲ್ಲ ನೀರಿದೆ ಎಂಬ ಬಗ್ಗೆ ಸಂಶೋಧನೆಗಳು ನಡೆಯುತ್ತಲೇ ಇವೆ. ನಮ್ಮ ಸೌರಮಂಡಲದಲ್ಲೇ ಇರುವಂಥ ಯಾವ್ಯಾವ ಗ್ರಹಗಳಲ್ಲಿ ನೀರಿದೆ ಎಂಬ ಸಂಶೋಧನೆಗಳೂ ನಡೆದಿವೆ. ಶನಿಗ್ರಹದ 16 ಚಂದ್ರರಲ್ಲಿಯೂ (ಉಪಗ್ರಹಗಳು) ನೀರಿರುವ ಸಾಧ್ಯತೆಗಳಿವೆ ಎನ್ನುತ್ತದೆ ಒಂದು ಸಂಶೋಧನೆ. ಅದರಲ್ಲೂ ಮುಖ್ಯವಾಗಿ ಶನಿಯ ಪ್ರಮುಖ ಚಂದ್ರಾದ ಟೈಟಾನ್ ಮತ್ತು ಎನ್ಸಿಲಾಡಸ್ನಲ್ಲಿ ನೀರಿರುವವುದು ಖಚಿತವಾಗಿ ಈ ಹಿಂದೆಯೇ ತಿಳಿದು ಬಂದಿತ್ತು.


ಇದೀಗ ಇನ್ನೂ ಒಂದು ಮಹತ್ವದ ವಿಚಾರವನ್ನು ನಾಸಾ ವಿಜ್ಞಾನಿಗಳು ಕಂಡುಕೊಂಡಿದ್ದಾರೆ. ಅದು- ಶನಿಯ ಚಂದ್ರ ಎನ್ಸಿಲಾಡಸ್ ಸತತವಾಗಿ ನೀರನ್ನು ಚಿಮ್ಮುತ್ತಲೇ ಇರುತ್ತದೆ. ಈ ರೀತಿ ಈರು ಚಿಮ್ಮುವ ಕಾರಣ ಶನಿಗ್ರಹದ ಸುತ್ತಲೂ ನೀರಿನ ಕಣಗಳು ಹರಿದಾಡುತ್ತಿವೆ. ಯೂರೋಪಿಯನ್ ಸ್ಪೇಸ್ ಏಜೆನ್ಸಿಯ ಹರ್ಷಲ್ ಬಾಹ್ಯಾಕಾಶ ದೂರದರ್ಶಕ ತೆಗೆದಂತ ಚಿತ್ರಗಳನ್ನು ಆಧರಿಸಿ ಈ ಸಂಶೋಧನೆ ನಡೆಸಲಾಗಿದೆ.

ಎನ್ಸಿಲಾಡಸ್ ಪ್ರತಿ ಸೆಕೆಂಡಿಗೆ 250 ಕೆ.ಜಿ.ಯಷ್ಟು ನೀರನ್ನು ಚಿಮ್ಮುತ್ತದೆ. ಶನಿಯ ಸುತ್ತಲೂ ನೀರಿನ ಅಂಶಗಳಿವೆ ಎಂದು 1997ರಲ್ಲೇ ಕಂಡುಕೊಳ್ಳಲಾಗಿತ್ತು. ಆದರೆ ಆ ನೀರಿನ ಅಂಶ ಎಲ್ಲಿಂದ ಬರುತ್ತದೆ? ಹೇಗೆ ಬರುತ್ತದೆ? ಎಂಬುದನ್ನು ಅರಿತುಕೊಳ್ಳುವ ಸಲುವಾಗಿ ವಿಜ್ಞಾನಿಗಳ 14 ವರ್ಷಗಳ ಸತತ ಸಂಶೋಧನೆ ನಡೆಸಿದ್ದಾರೆ. ಇಂಥದ್ದೊಂದು ಪ್ರಕ್ರಿಯೆ ಬೇರಿನ್ನಾವ ಗ್ರಹಗಳಲ್ಲೂ ಕಂಡುಬರುವುದಿಲ್ಲ.
ಶನಿಗ್ರಹದಲ್ಲಿ ನೀರಿನ ಅಂಶವಿದೆ ಎಂಬುದಾಗಿ ಬಹಳ ವರ್ಷಗಳಿಂದಲೇ ವಿಜ್ಞಾನಿಗಳು ಹೇಳುತ್ತಾ ಬಂದಿದ್ದಾರೆ. ಆದರೆ ಅಲ್ಲಿನ ವಾತಾವರಣವು ಮಾನವ ವಾಸಿಸಲು ಯೋಗ್ಯವಾಗಿಲ್ಲ. ಆದರೂ ಅಲ್ಲಿ ಜೀವಾಸ್ತಿತ್ವ ಇದೆಯೇ ಎಂಬ ಯೋಚನೆಗಳೂ ಬಂದಿದ್ದವು. ಇರಲಿ, ಬಾಹ್ಯಾಕಾಶದ ಒಂದೊಂದು ವಿಷಯವೂ ವಿಸ್ಮಯವನ್ನೇ ತಂದುಕೊಡುತ್ತದೆ. ಇನ್ನೂ ಅದೆಷ್ಟು ರಹಸ್ಯಗಳನ್ನು ಈ ಬ್ರಹ್ಮಾಂಡ ಒಳಗೊಂಡಿದೆಯೋ?