ಗಣೇಶ ತಾಂಡವ ಕಾವ್ಯ

(ತಾಂಡವ ನೃತ್ಯ ಮಾಡುವ ಮುದ್ದು ಬೆನಕನ್ನು ಕೊಂಡಾಡುವ ಈ ಕೀರ್ತನೆಯ ಸುಮಧುರ, ಅದ್ಭುತ ಗಾಯನ ಆಲಿಸಲು ಈ ಕೆಳಗಿನ ಲಿಂಕ್ ಕ್ಲಿಕ್ ಮಾಡಿ...

https://youtu.be/Czygtybx1pI )

ಶಿವನ ಶೂಲದಿರಿತಕೊರಗಿ ಗಜನ ಶಿರವನಿರಿದು ತಂದು

ಕೊರಳೊಳಿರಿಸುತಲೆದ್ದು ಬಂದ ಮುದ್ದು ಕಂದ ಗಣಪ |

ಪಿರುದುದಾಕರ್ಣವೇನ್ ಚಂದ ಕಿರಿನಯನದಾನಂದ

ನೀಳನಾಸಿಕವುದರ ಬ್ರಹ್ಮಾಂಡ ವಕ್ರತುಂಡ ಬೆನಕ ||೧||

ಜ್ವಲಿಸುತಾಖಂಡಮಂಡಲ ಕೆಡುಹಿ ಮೂಷಕನತಿಭಂಡ

ಅಂಕ ಬಿಂಕ ಡೊಂಕ ಡಂಭ ಮುರಿದು ಗೆಲಿದ ವೀರ|

ಋಷಿಜನ ಸುರರತಿಭಯ ಭಯ ವಿನಾಶಕ ನಲಿದ

ಢಮ ಢಮ ಢಮರನಿನಾದ ಜಯ ಜಯಹೇ ರಿಪುಸಂಹಾರ ||೨||

ಗಣಪತಿ ಸೋದರ ಶರವಣ ಕೂಡಿ ವಾಹನವೇರಿ

ಜಗಜಗದಗಲ ತಿರುಗೀಕ್ಷಿಪ ಪರಿಯದು ನೋಡಿ |

ಶಿವಶಿವೆಗೆರಗಿ ತಾ ಕರಮುಗಿದು ಪದಪಿಡಿದು

ಅಂಡ ಪಿಂಡ ಬ್ರಹ್ಮಾಂಡವೈ ನೀವೆಂದ ಮೊದಲ್ವಂದಿತ ||೩||

ಅರಿಗಳೆಂಟು ಮನುಜ ಮನದಿ ಮನೆಯ ಮಾಡಿ

ಮೇಲೆ ಬಿದ್ದು ಮೇಧೆ ಮೆದ್ದು ಮತಿ ಮಂದವಾಗಿ |

ಮಮ ಕಾಮ ಮದ ಮೋಹ ಮತ್ಸರ ಕ್ರೋಧ

ಲೋಭಾಹಂಗಳರಿದು ತರಿದ ತಾಂಡವ ಗಣಪ || ೪ ||

ಬಂಡಿ ಬಂಡಿ ಬಂಡಿ ತಿಂಡಿ ಭಕ್ಷ್ಯ ಭೋಜ್ಯವೆಲ್ಲವುಂಡು

ಗುಂಡುಗುಂಡುಗಾಗಿ ಎಡವಿಬಿದ್ದು ಧಿಗ್ಗನೆದ್ದ ಸುಂದರ |

ಹಾವ ಪಿಡಿದು ಗಟ್ಟಿಯಾಗಿ ಉದರ ಬಿಗಿದು ಗೇಲಿಮಾಳ್ಪ

ಚಂದ್ರಮಗೆ ಶಾಪವಿತ್ತು ನಶಿಪ ಪರಶುಪಾಶಧರ ||೫||

ಗಣ ಗಣವಗಣಿತ ಶಿವಗಣ ಭೂತಗಣಗಳ ಕೂಡಿ

ಅಸುರರೆದೆ ಬಗೆದು ಮೂಜಗವ ಕಾಯ್ವ ಗಣನಾಯಕ |

ಧಿಕ್ ತಕಿಟ ಧಿಕ್ ತಕಿಟ ಧಿಕ್ ತಕಿಟ ತಾಂಡವನಾದ

ತಕ ತಕಿಟ ತಾನಲಿದ ಪರಶಿವನೊಲವ ವಿನಾಯಕ ||೬||

ಗಂಗೆಗೌರಿಯೊಲವ ಕಂದ ಚೆಂದ ಬೆನಕನ

ವಿಧ ವಿಧ ಪರಿ ಪರಿ ಸುತಿಸಿರೊಲಿವಳಮ್ಮ ಲಕುಮಿ |

ಜಪ ತಪ ಬಲು ಬಕುತಿಯಲಿ ಧೇನಿಸಿ ಬೇಡಿರೆ

ಹರುಷದಿ ಕರುಣಿಪ ವರಗಳನಗಣಿತ ಗಣಪ ||೭||

ಹರಿಹರ ಸುರ ಋಷಿ ಗುರುಜನ ಮಾನಸ ಪೂಜಿತ

ಕಳೆಕಳೆದು ಕುಲಕಾಯ್ದು ಕರುಣೆಯಲಿ ಕಾಪಾಡು |

ಹೇ ಕರಣಾಕರ ಲಂಬೋದರ ಢುಂಢಿರಾಜ

ಸಿದ್ಧಿದಾಯಕ ಬುದ್ಧಿದಾಯಕ ನಮಸ್ತೇ ನಮಸ್ತೇ ||೮||

ಕವಿಪಯಣಿಗನ್ಬರೆದೀ ಕಾವ್ಯವನು

ಬಕುತಿಯಲಿ ಪಾಡಿ ಭಜಿಸಿರೆ |

ಭಜಿಪ ಸ್ತುತಿಯನಿನಿತು ಕೇಳಿರೆ

ಹರಸಿ ಕಾಯ್ವನು ಭಕ್ತವತ್ಸಲ ಗಣಪ || ೯||

- ಪ್ರಕಾಶ ಪಯಣಿಗ